تنبيه:

هذا الموقع هو دليل غير رسمي تم إعداده بمساعدة بعض الزملاء في الكلية للطلاب الجدد، ولا يمثل الجهة الرسمية للكلية.

كل ما يهم طالب الفرقة الأولى بكلية العلوم جامعة دمياط

دليل شامل لمختلف البرامج والتخصصات ومجالات العمل المتاحة.

🖥️ برنامج علوم الحاسب

أولاً: التنسيق

يتميز الكلية اللي ممكن تخصص من سنة أولى بالنسبة لقسم علوم حاسب وتكون جايب درجة كويسة في الرياضة.

ثانياً: هندرس إيه في سنة أولى؟

سنة أولى بتكون سنة دراستها شاملة هتدرس فيها كيميا وفيزيا ورياضيات إلى جانب أنك هتخطي أول سلمة في لغتين بايثون و ++C.

وبعد كده بتبدأ أنك تدرس مواد التخصص من خوارزميات وتحليل بيانات وذكاء اصطناعي وغيره.

ثالثاً: هنشتغل إيه بعد الكلية؟

قسم الحاسب في كلية العلوم بيأهل خريجين يشتغلوا في مجالات قريبة من خريجي حاسبات ومعلومات، لكن مع تركيز أكتر على الأساسيات العلمية (رياضيات - منطق - خوارزميات - برمجة - شبكات – قواعد بيانات).

ممكن تشتغل في:

البرمجة وتطوير البرمجيات (Software Developer) مبرمج، مطور تطبيقات موبايل أو ويب، مطور ألعاب.
قواعد البيانات: محلل بيانات (Data Analyst)، مطور أو مدير قواعد بيانات (Database Administrator).
الذكاء الاصطناعي وتحليل البيانات: Machine Learning Engineer, Data Scientist, Computer Vision / NLP specialist.
الشبكات وأمن المعلومات: Network Engineer, Cybersecurity Specialist.
المجال الأكاديمي والبحثي: معيد أو باحث في الجامعة (لو كمل دراسات عليا)، باحث في الذكاء الاصطناعي والحوسبة العلمية.
مجالات أخرى: IT Support / System Admin, Testing & Quality Assurance.

ملحوظة:

بعض الشركات بتفضل خريجي حاسبات ومعلومات أو هندسة حاسبات، لكن خريج علوم حاسب لو عنده مهارات كويسة (برمجة، مشاريع، كورسات عملية) بيقدر ينافس بقوة.

📚 برنامج الرياضيات

مقدمة عن البرنامج

قسم الرياضيات من أهم الأقسام الأساسية في كلية العلوم. يهتم بدراسة الرياضيات البحتة والتطبيقية، ويُعتبر أساسًا لعلوم كثيرة زي الفيزياء، الحاسبات، والإحصاء. القسم بيهدف لتخريج كوادر متميزة في التفكير المنطقي والتحليل الكمي.

الدراسة داخل القسم

المواد تشمل:

رياضيات بحتة (جبر، تحليل رياضي، هندسة الفراغية، نظرية الأعداد...).
رياضيات تطبيقية (معادلات تفاضلية، ميكانيكا رياضية، بحوث عمليات...).
إحصاء واحتماالت.

عندنا حالياً بعض مواد البرمجة اللي بتخدم بشكل كبير الرياضيات والأرقام والرسومات البيانية وتحليل البيانات حاجات زي (Mathimatica, Matlab, R, Excel).

الدبلومات والدراسات العليا بعد التخرج

بعد البكالوريوس، الطالب يقدر يلتحق بـ:

دبلوم عام في الرياضيات.
دبلوم خاص في أحد التخصصات (بحتة / تطبيقية / إحصاء / حاسب).
ماجستير في الرياضيات.
دكتوراه في التخصص الدقيق.

مجالات العمل للخريجين

خريج قسم الرياضيات يقدر يشتغل في:

التدريس (مدارس – جامعات – مراكز تدريب).
مجال البرمجة وتكنولوجيا المعلومات.
شركات الاتصالات والبنوك (محلل بيانات – إحصاء).
مراكز البحوث العلمية.
شركات التأمين وإدارة المخاطر.
هيئات الأرصاد الجوية والمجالات الإحصائية.

ويسلم بقا لو عملت كورسات في البرمجة حتبقا فرصتك أحسن من حاسبات وهكذا.

مميزات دراسة الرياضيات

فكرته إنك بتجيب الرياضة من تحت أوي وبتاخد كل حاجة فيها يعتبر فـ عشان كده لو دمجته مع الحاسب أو البرمجة تقدر تعمل حاجات كتير مكنتش فـ إيد بتوع حاسبات.

فتح مجالات متعددة في سوق العمل المحلي والدولي (أهم حاجة الدولي طبعاً).

إمكانية الدمج بين الرياضيات وعلوم أخرى (مثل الحاسب، الذكاء الاصطناعي، الإحصاء الحيوي).

⚛️ برنامج الفيزياء (منفرد)

بيركز على دراسة القوانين اللي بتحكم الطبيعة بداية من الجسيمات الدقيقة لحد الكون كله.

الهدف:

فهم الظواهر الفيزيائية الطبيعية.
تطوير مهارات فيزيائية ورياضية لحل المشكلات.
تأهيل الطالب لمجالات البحث والتكنولوجيا الحديثة.

مقررات البرنامج:

ميكانيكا كلاسيكية، كهرباء ومغناطيسية، ميكانيكا الكم، فيزياء نووية وإشعاعية، فيزياء الحالة الصلبة، بصريات وليزر، إلكترونيات وأشباه الموصلات، فيزياء حديثة ومتقدمة، وغيره كتير طبعاً بشكل يلم كل مبادئ الفيزياء المهمة لتأسيس كويس في العلم كله.

الجانب العملي:

معامل فيزياء عامة وتجريبية.
تجارب على أجهزة الليزر والبصريات.
تدريبات على أجهزة القياس الإلكترونية.

فرص العمل:

مراكز الأبحاث – الجامعات – معامل الإلكترونيات والليزر – محطات الطاقة – هيئات الأرصاد – شركات تكنولوجيا – التعليم – شركات البترول – المفاعلات النووية – معامل المستشفيات (الفيزياء الطبية).

👨‍💻 برنامج الفيزياء وعلوم الحاسب (المزدوج)

بيجمع بين فهم الفيزياء العميق وتطبيقات علوم الحاسب العملية.

الهدف:

إعداد خريج يجمع بين التحليل الفيزيائي والبرمجة الحاسوبية.
مواكبة احتياجات سوق العمل في مجالات التكنولوجيا.

مقررات البرنامج:

مقررات الفيزياء الأساسية (زي البرنامج المنفرد) ومقررات علوم الحاسب (برمجة بلغة python، مبادئ البرمجة، هياكل بيانات وخوارزميات، قواعد بيانات، شبكات الحاسب، تصميم المواقع، وغيره كتير طبعاً).

الجانب العملي:

معامل فيزياء متقدمة (زي قسم فيزياء).
معامل حاسب للتدريب العملي على البرمجة.

فرص العمل:

شركات البرمجيات – شركات الإلكترونيات – مراكز بحوث الفيزياء التطبيقية – تكنولوجيا المعلومات – شركات الاتصالات – مراكز البيانات – الطاقة المتجددة – المفاعلات والفيزياء النووية – التدريس والجامعات.

الدبلومات المتاحة في الكلية:

إلى جانب البرامج الأساسية، الكلية بتوفر دبلومات بعد البكالوريوس بالنسبة لقسم الفيزياء (دراسات عليا) زي الفيزياء الفلكية واستكشاف الفضاء.

باختصار:

قسم الفيزياء وعلوم الحاسب بيديك علم نظري + تدريب عملي + مهارة في الحوسبة، وبيفتحلك مجالات واسعة جدًا سواء في البحث العلمي أو في سوق العمل التكنولوجي.

⌬ برنامج علم الكيمياء

اسمحلي أقولك إن دراسة الكيميا من أمتع الدراسات ومن أمتع العلوم عمومًا خصوصًا الجزء العملي والتيست تيوب والألوان اللي متجيش غير من الكيميا والروايح اللي هتقابلها لأول مرة فـ حياتك وبردو من الكيميا، يعني سكشن كله كله ألوان وروايح ومليان فضول أو هدوم بتبوظ أيهما أقرب.

بص يا سيدي أنت لو بتحب الكيميا على حق والتفاعلات والدنيا دي فـ أهلاً بيك مكانك هنا، أقل حاجة هتعرف إزاي الـ Na ارتبط بالـ Cl بس بجد بقا مش رابطة أيونية وخالص.

هتدرس أورجانك على حق بقا بكل تفرعاتها وريأكشنات الكربون وهتدرس إن اورجانك وكيميا حرارية، كيميا كهربية، كيميا فيزيائية، كيمياء نووية وغيرهم كتير يعني بص هو كل ما يخص الكيميا هتلاقيه على مدار دراستك في الكلية عشان تتخرج كيميائي كيميائي فعلاً.

القسم عندنا في علوم دمياط متاح لخريج ثانوية عامة علمي رياضة لكنه بتنسيق داخلي بدرجة الكيميا في 3ث وبيختلف كل سنة ومش ثابت.

الدبلومات ومجالات الشغل

بعد ما تتخرج بيبقا متاح ليك دبلومات في مجالات الكيميا بحيث انك تقدر تعزز معلوماتك وتزود لنفسك فرص ومجالات الشغل زي:

دبلومة الكيمياء التطبيقية.
دبلومة الكيمياء التحليلية.
دبلومة كيمياء التغذية.

علوم مميزة بتعدد مجالات الشغل وكيميا بالأخص بيتطلب في مجالات أكتر يعني ممكن تشتغل:

كـكيميائي في مصانع الأدوية والكيماويات.
في شركات مستحضرات التجميل، الأصباغ، البلاستيك، الحديد والصلب.
في معامل وشركات التحاليل الطبية.
شركات الأدوية، الأسمدة، السكر، المياه والكهرباء.
الجودة.
بيُفضل في شغل المصانع وفي الكيمياء الشرعية عن أي قسم تاني.
التدريس.

برضو أيها الكيميائي بيختلف مسماك الوظيفي على حسب شغلك يعني ممكن يبقى لقبك: مراقب جودة، أخصائي تحاليل، باحث كيميائي، كيميائي مبيعات وغيرهم كتير زي ما قولنا على حسب مقر شغلك.

الدراسة بتكون general أول سنة بعد كده بتتفرغ للكيمياء بكل فروعها اللي تتخيلها ومتتخيلهاش والقسم عادي مش كريديت.

الحمد لله القسم كويس ومستقبله حلو وفي ناس بتشتغل من قبل ما تتخرج كمان ودي حالات كتير حصلت قدام عيني. الدراسة في القسم صعبة بس مستقبلها يستاهل.

🩸 برنامج الكيمياء الحيوية والكيمياء

هو برنامج بيولوجي تابع لقسم الكيمياء دراسته جميلة جدًا وهي مقسمة لجزئين:

جزء الكيمياء الحيوية

العمليات الحيوية في جسم الإنسان من تفاعلات البروتين والفيتامينات والكربوهيدرات بيدرس كيفية تخليقهم داخل الجسم بصيغة كيميائية وإيه المترتب على نقصان أو زيادة أي عنصر فيهم.
بيدرس الأحماض النووية (DNA).
علم المناعة والوراثة والهرمونات.
علم الإنزيمات والأورام البيولوجية وجميع التفاعلات الناتجة عنها أو المسببة إليها.

جزء الكيمياء

من أهمهم وهو الكيمياء العلاجية ومنها المسكنات وخافضات الحرارة ومضادات البكتيريا والفطريات والفيروسات والطفيليات.
كيمياء عضوية وغير عضوية وتحلية وفيزيائية وكيمياء العقاقير وكيمياء الفيتامينات وكيمياء اكلينيكية.

مجالات تانية بيدرسها القسم مهمة جداً برضو: الهندسة الوراثية والعلاج الجيني والكيميائي والبيولوجي والإحصاء الحيوي.

مجالات العمل

معامل وشركات التحاليل الطبية وشركات ومصانع الأدوية.
معاهد الأورام ومعاهد السرطان.
مصانع وشركات مستحضرات الطبية.
مصانع البتروكيماويات والخميرة.
مجال العمل الأكاديمي.

دراسة القسم تؤهلك أنك تكمل دراسات عليا أو دبلومات بسبب تنوع المجالات المتاحة ليك. تقدر طبعاً تعمل الماستر وتتعين في الجامعات الخاصة. تسافر برا مصر في مجالات العمل أو تعمل الدكتوراه وده في كلية علوم أسهل من أي كلية تانية (بتكلم على الكلية مش القسم) -- وده مجال كويس جدًا للي عايز يهرب من الشغل الروتيني بتاع معمل التحاليل وشركات الأدوية وكده ولكن كله بكفائتك طبعاً وإصرارك والمشوار مش سهل.

🏞️ برنامج العلوم البيئية (منفرد)

قسم العلوم البيئية بيدرس العلاقة بين الإنسان والبيئة من خلال العلوم البيولوجية والكيميائية والفيزيائية والجيولوجية. هدفه إنه يواجه التحديات البيئية زي التغير المناخي، التلوث الهوائي والمائي، واستنزاف الموارد الطبيعية... وكمان يالقي حلول مستدامة.

مقررات البرنامج:

سلوك الأحياء البيئية، إدارة المخلفات الصلبة والخطرة، الكوارث الطبيعية وإدارة المخاطر، نظم المعلومات الجغرافية (GIS)، التلوث الهوائي والضوضائي والإشعاعي، تقييم الأثر البيئي، الموارد المائية وإدارة السواحل، الطاقة الجديدة والمتجددة... وغيرهم كتير.

الدراسة مش نظرية بس:

تجارب عملية في المعامل، زيارات ميدانية لمحطات المياه والصرف، شركات إعادة التدوير، المحميات الطبيعية، هيئة الأرصاد الجوية، هيئات حماية الشواطئ.

فرص العمل:

وزارة البيئة – جهاز شؤون البيئة – الميناء – شركات المياه – معامل جودة الهواء والمياه – مكاتب الاستشارات البيئية – شركات الطاقة – المحميات الطبيعية – مراكز – GIS شركات البترول والغاز – شركات تدوير النفايات – محطات الأرصاد الجوية – مراكز الأبحاث والجامعات – المنظمات الدولية (UNEP – WHO – CGIAR).

🏞️ برنامج العلوم البيئية والكيمياء (المزدوج)

بيجمع بين دراسة علوم البيئة والكيمياء (التحليلية – العضوية – الفيزيائية – غير العضوية). الخريج بيكون فاهم مشاكل البيئة وتأثير الملوثات، ومعاه أدوات الكيمياء اللي تساعده يحلل ويقيس ويبتكر حلول عملية.

مقررات البرنامج:

مقررات علوم البيئة (زي اللي فوق) والكيمياء العضوية والتحليلية، الكيمياء الفيزيائية وغير العضوية، كيمياء المياه والتربة، كيمياء الصناعات الكيماوية والدوائية، كيمياء الأغذية والملوثات.

الجانب العملي:

معامل كيميائية متقدمة، زيارات لمعامل الأغذية، شركات الأدوية والكيماويات، مصانع الصناعات الكيماوية، محطات معالجة المياه.

فرص العمل:

المعامل البيئية والكيميائية – شركات الصناعات الكيماوية والدوائية – معامل الأغذية وضبط الجودة – محطات معالجة المياه والتحلية – شركات الأدوية والمبيدات – شركات البترول والطاقة – معامل التحاليل الطبية – الجامعات والمراكز البحثية – مكاتب الاستشارات البيئية والكيميائية.

باختصار:

قسم العلوم البيئية بيديك علم + مهارة + خبرة عملية✨ وبيأهلك لمجالات عمل متنوعة وواسعة... علشان تكون جزء من الحل مش المشكلة وتشارك في حماية البيئة وتحقيق التنمية المستدامة.

🌋 برنامج الجيولوجيا والكيمياء

البرنامج ده بيجمع بين علمين أساسيين:

الجيولوجيا: علم الأرض، اللي بيدرس الصخور، المعادن، المياه الجوفية، البترول، الغاز، والبيئة. الجيولوجيا بتعرفنا على تاريخ الأرض وتكوينها، وكمان بتفتح لنا مجالات مهمة زي التنقيب، التعدين، واستكشاف الموارد الطبيعية. خلال ٤ سنين بتوع الكلية هندرس كل ما يخص الجيولوجيا سواء جيولوجيا طبيعية أو معادن وبلورات أو حفريات أو جيوكيميا وغيره كتير من الفروع.

الكيمياء: العلم اللي بيدرس المادة من أصغر جزء فيها لحد التفاعلات الكبيرة اللي بتحصل حوالينا كل يوم. هنا هتتعلموا عن تركيب العناصر والمركبات، طرق التحليل، الصناعات الكيميائية، وكمان التطبيقات اللي بنستخدمها في حياتنا اليومية. الكيمياء بردو هندرسها بالتفصيل.

الميزة الحقيقية في القسم إنكم بتاخدوا خلفية علمية واسعة ومتكاملة، لأنكم بتجمعوا بين الكيمياء والجيولوجيا، وده بيخليكم مؤهلين للشغل في مجالات متعددة زي: ✔ شركات البترول والغاز، ✔ شركات التعدين والمحاجر، ✔ معامل التحاليل والرقابة البيئية، ✔ التدريس والتعليم، ✔ المراكز البحثية والجامعات.

⚒ برنامج جيولوجيا البترول والتعدين

البرنامج ده بيركز على جزأين أساسيين:

جيولوجيا البترول: ودي بتدرس تكوين البترول والغاز الطبيعي، إزاي بيتكونوا في باطن الأرض، إزاي نكتشف أماكنهم باستخدام طرق علمية زي الجيوفيزياء والجيوكيمياء، وكمان إزاي نستخرجهم ونستفيد منهم كمصادر طاقة رئيسية للعالم.

التعدين: وده مجال بيركز على دراسة الخامات المعدنية والصخور الاقتصادية، إزاي نستكشفها ونحدد أماكن وجودها، وطرق استخراجها بشكل آمن واقتصادي. المعادن دي مش بس دهب وفضة، لكن كمان حديد، فوسفات، منجنيز، ورخام... وكل الثروات اللي بتعتمد عليها الصناعة.

✨الميزة الكبيرة في القسم إنه بيؤهلكم لمجالات عمل مطلوبة جدًا زي: ✔ شركات البترول والغاز، ✔ شركات التعدين والمحاجر، ✔ هيئات الثروة المعدنية والبحوث الجيولوجية، ✔ مجالات البيئة وحماية الموارد الطبيعية.

"وحاجة مهمة جدًا لازم تكونوا عارفينها من البداية: الدكاترة عندنا بيحبوا الطالب المجتهد، واللي داخل المحاضرة وهو مذاكر وفاهم. يعني مش مجرد حضور المحاضرة، لكن كمان متابعة أول بأول. المذاكرة هنا مش حاجة ثانوية، بالعكس، هي جزء أساسي من النظام. الدكاترة دايماً بيشجعوا إن الطالب يذاكر أولاً بأول، يحضر المحاضرات، ويشارك بالأسئلة. والسكاشن (العملي) حضورها مهم جداً وعليه درجات. ولو اتعودتوا على كده من البداية، هتلاقوا المواد كويسة وهتستمتعوا بيها أكتر. والدراسة في القسم معظمها بالإنجليزي وممكن بنسبة قليلة جداً يكون في مقرر بالعربي. الدراسة في القسم محتاجة جهد والتزام، لكنها ممتعة جدًا، القسم مليان دكاترة ومعيدين وزمايل دايماً مستعدين يساعدوكم. بالتوفيق."

🐠 برنامج علوم البحار البيولوجية

البرنامج تابع لقسم الحيوان. وهو من البرامج المنفردة (مش معاه كيميا). أول ترم زي أي برنامج بتاخد مواد من كل الأقسام (كيميا عامة وعضوية وفيزيائية، تفاضل وتكامل، فيزياء، نبات، حيوان). ومن الترم الثاني هتبدأ تاخد مواد تخصص ليك واللي هي مادة مدخل في علوم البحار.

إيه فايدة البرنامج أو بندرس إيه؟ هتدرس كل حاجة ليها علاقة بالبحر (علوم بحار فيزيائية، علوم بحار كيميائية، علوم بحار جيولوجية) + بيولوجيا الأسماك وسلوكها وفسيولوجي الأسماك، المصايد وأنواعها وكل حاجة. يعني الدراسة قمة في المتعة بجد خاصة للناس اللي بتحب بيولوجي. القسم حقيقي كله مميزات🫶 ومش معنى إن القسم مش مزدوج إن فرص الشغل ليه قليلة بالعكس تماماً، فرص الشغل فيه كويسة جداً لأن أنت بتدرس (كيميا حيوية وميكروبيولوجي وبيئة بحرية)، يعني بتجمع بين معظم العلوم.

من مجالات العمل المتاحة لينا:

إدارة المصايد ومشاريع الاستزراع السمكي.
المحميات الطبيعية.
مجال البحث العلمي في معاهد علوم البحار.
في شركات الملاحة والنقل البحري.
الموانئ.
شركات البترول.
شركات تحلية المياه.
إدارة المناطق الساحلية والسياحة البيئية.
مهندس سواحل.
العمل في مصانع الأعلاف.

وطبعاً دا كله غير أنك تشتغل في أعضاء هيئة التدريس سواء فـ الكلية أو في معاهد علوم البحار.

طب المذاكرة إزاي؟ أولاً فـ الأول بنحس إننا تايهين والموضوع جديد علينا وكبير بس محدش من الدكاترة هيسيبك. أول حاجة الالتزام طبعاً فـ المحاضرات وتركزوا مع الدكاترة وتكتب كل حاجة معاه والمذاكرة طبعاً أول بـ أول والدكاترة عندنا فـ القسم من أحسن الدكاترة عامة يعني هتحس أنك بتتعامل مع أخواتك الكبار وعيلتك ومش هيبخلوا عليكوا بـ أي معلومة.

🦠 برنامج البيولوجيا الجزيئية

هل نعرف مجالات بيولوجيا جزيئية؟ لا لا، غير اللي قرأتوه في اللائحة أو لسه هتقرأوه في العموم. هل دورنا على بيولوجيا جزيئية؟ دلوقتي لو هنتكلم عن البرامج المميزة عندك 3 اختيارات: بيولوجيا جزيئية، التكنولوجيا الحيوية، وجيولوجيا بترول وتعدين. ليه تختار بيولوجيا جزيئية؟ فيه نقطة معظمنا بيغفل عنها: إن بيولوجيا جزيئية موجودة ضمن قسم حيوان، وده معناه إن الكورسات والمواد اللي بتتأخد بتكون مرتبطة بالنظام ده. أنت لما بحثت وصلت لإيه؟ بص، هو صعب نقول فرق محدد مع التخصصات التانية، لكن Molecular Biology تقدر تعتبرها دراسة الأساسيات (الـ Basic). Molecular Biology: هو العلم اللي بيدرس المكونات الأساسية اللي موجودة في الخلية، يعني النواة (nucleus) وما تحتويه (DNA, RNA, بروتين, الإنزيمات)، والتحليلات اللي بتحصل على المستوى ده. زمان كنا بندرس العلوم دي على مستوى الفسيولوجي والمورفولوجي، يعني الحاجات الظاهرية اللي بره. لكن دلوقتي بندخل جوه الخلية ونشوف تفاصيلها من الداخل. زي ما أخدته في ثانوية عامة، الجزء الخاص بالـ DNA ومعاد الاتحاد، لكن محدش كان بيشرحه بإستفاضة لأن مش مجال تخصصه. وهنا ييجي دور البيولوجيا الجزيئية، لأنها مش مجرد حفظ، هي محتاجة خبرة عملية ومعملية. يعني مثلاً لما نقول هنعمل extraction للـ RNA اللي في الخلية: لازم الأول تعرف إزاي تكسر الخلية نفسها، وتفصل النواة، وبعدها تتعامل مع الـ DNA والـ RNA والبروتينات. طب كده وصلنا أن Molecular Biology: أنا بدرس كل حاجة في الخلية الحيوانية، النباتية، الإنسان، أي حاجة على مستوى النواة. مثال عملي بسيط يوضح قوة المجال: إنتاج الأنسولين الصناعي. عشان توصله، لازم الأول تفهم الجين الخاص بالأنسولين وطريقة عمله – وده جوهر البيولوجيا الجزيئية. بعدين من خلال تطبيقات لاحقة ممكن يتنقل لبيئات مختلفة زي البكتيريا ويتم إنتاجه على نطاق واسع. لكن البداية كلها بتكون من الفهم العميق للخلية والجينات داخلها، وده هو أساس Molecular Biology. الخلاصة: البيولوجيا الجزيئية هي دراسة الأساسيات والجزيئات الحيوية داخل الخلية. هي العلم اللي بيدخلك أعماق الخلية ويخليك تعرف تفاصيل الـ DNA، الـ RNA، البروتينات، وكيفية عملهم. ولو فهمت Molecular Biology صح، هتقدر تبني عليها مجالات وتطبيقات أكبر بعد كده.

🐸 برنامج الحيوان والكيمياء

برنامج بيولوجي تابع لقسم الكيمياء ودراسته ممتعة جدا ومُحمسة متقسم لجزئين

الجزء الأول هو دراسة علم الحيوان والتصنيف ( systematic position)🐸

الفسيولوجي ( فسيولوجية جسم الكائن الحي ) والأناتومي (التشريح )
فسيولوجيا الخلية + خلية وبيولوجيا جزيئية
كيمياء الأنسجة والتقنية المجهرية ( Histochemistry and microscopic technique) ودي درسنا فيها الانسجه وصباغتها وشوفناها تحت الميكروسكوب بأنواعها وأنواع الصبغات المختلفه اللي كل نسيج بيتصبغ بيها
الحبليات والتطور العضوي
مقدمة في علم اللافقاريات + لافقاريات طبية + لافقاريات متقدم وطفيليات ( parasitology)
علم الوراثة والچينوم والحمض النووي المختلف
علم الحشرات وأنواعها المختلفة وطريقة تجميعها وتثبيتها
بيئة حيوانية + بيولوجيا الحماية ليهم علاقة بالبيئة وازاي نحافظ عليها وعلي الحيوانات من الانقراض والطيور وطريقة رصدها والتعرف عليها بمختلف أنواعها وأحجامها

الجزء التاني وهو جزء الكيمياء ( عام لكل الأقسام فـ الغالب)🧪

كيمياء عامة (1+2) دي بندرس فيها حاجات بسيطة وخفيفة يكاد تكونوا سمعتوا عنها قبل كده عادي
كيمياء عضوية( أليفاتية + اروماتية) زي عضويه 3 ثانوي بتوسع اكتر وممتعة اكتر
كيمياء غير عضوية ( دراسه عناصر s, p + عناصر d, f في الجدول الدوري )
كيمياء فيزيائية ( حركية + ديناميكا حرارية + النظرية الحركيه للغازات شويه إثباتات وقوانين مهمين جدا وطريقه اثباتهم بالخطوات دي اهم حاجه )
كيمياء كهربية (1+2) بندرس فيها الخلايا الكهربية ، علاقة الكهرباء بالتفاعلات الكيميائية او العكس
الكيمياء العلاجية + فيتامينات ( العلاجيه : المسكنات وخافضات الحرارة ومضادات البكتريا والفطريات والفيروسات والطفيليات )
تحليل بالأجهزة
كيمياء عضوية ( صبغات + طيف )
كيمياء عضوية ( سكريات + فراغية)

مجالات العمل بقي 🤩

البحث العلمي في الجامعات والمراكز البحتية.
التحاليل الطبية والمياه والمعامل،
وزارة البيئة والمسطحات المائية.
مراقبة الأغذية وجودة المنتجات.
مراكز التحصين واللقاح وبنوك الدم.
الحقن المجهري وأطفال الأنابيب.
وهكذا تقدروا تعملوا دبلومة في مجالات مختلفة تانية

بالتوفيق يا شباب ربنا معاكم ويوفقكم يارب 🥰.

🌱 برنامج النبات والكيمياء

القسم بيدمج بين علم النبات والكيمياء علشان يجهز خريج عنده خلفية قوية عن الكائنات النباتية وتركيبها الكيميائي وتطبيقاتها في الزراعة، الصناعة، والدواء. برنامج النبات والكيمياء: الهدف: دراسة التركيب الفسيولوجي والتشريحي للنباتات، فهم العمليات الكيميائية الحيوية داخل النبات، استخدام الكيمياء في تحليل التربة، المياه، والأسمدة، تطبيقات النباتات في الصناعات الدوائية والغذائية والزراعية. المقررات الأساسية: من علم النبات: تشريح ووظائف الأنسجة النباتية، الفسيولوجيا النباتية، النباتات الطبية والعطرية، علم الوراثة والتكنولوجيا الحيوية النباتية، التنوع النباتي وتصنيف النباتات. من الكيمياء: الكيمياء التحليلية، الكيمياء العضوية، الكيمياء الفيزيائية، الكيمياء غير العضوية، الكيمياء الحيوية (Biochemistry). الجانب العملي: معامل نبات لدراسة الأنسجة والوظائف، معامل كيمياء متقدمة لتحليل العينات النباتية والمركبات، زيارات ميدانية لمعامل الصناعات الدوائية، مصانع الأغذية، مزارع النباتات الطبية. فرص العمل: معامل التحاليل النباتية والكيميائية، شركات الأسمدة والمبيدات، مصانع الأدوية والمستحضرات الطبية، مراكز البحوث الزراعية والبيوتكنولوجي، شركات الأغذية والزيوت النباتية، معامل الجودة والمراقبة الكيميائية، الجامعات والمراكز البحثية. باختصار: قسم النبات والكيمياء بيدمج العلوم البيولوجية والكيميائية علشان يجهز خريجين عندهم معرفة علمية قوية ومهارات تطبيقية تخليهم مؤهلين لمجالات الزراعة، البيئة، الأدوية، والصناعات الكيميائية.

🧫 برنامج الميكروبيولوجي والكيمياء

أول حاجة هنتكلم شويااا يعني إيه ميكروبيولوجي ؟؟ القسم ده بتدرس فيه كل حاجة من حيث بكتيريا فطريات فيروسات طحالب ..... بتأثيرهم على الوسط اللي عايشين فيه والنمو بتاعهم والأنزيمات اللي بتتفرز منهم وعلى حسب اختلاف كل كائن والفصل الملائم لنموه وكمان المشاكل اللي بتسببها من حيث أمراض بداخل وخارج جسم الإنسان وعلى النبات والأعراض اللي بتظهر تدل على وجود الميكروب ده وإزاي نقاومه ونتغلب عليه.

أما من حيث المواد بسيطة جداً لما تطلعوا تانية إن شاء الله هتاخدوا أساسيات كل مادة وطريقة الشغل في المعمل وهتدرسوا كمان إزاي بتتضاعف ودراسة DNA بتاعها وكمان تأثيرها على الطعام بالكويس والوحش. أما التخصص هيبدأ مع حضراتكم من الترم الثاني في سنة أولى هتاخدوا مادة الميكروبيولوجي هتدرسوا أساسيات عن كل كائن شابتر عن البكتيريا شابتر عن الفيروسات وكذلك ومادة بسيطة وهتبقى ضامن الامتياز لأن حضرتك ده هيبقى تخصصك ولازم تكون متميز فيه علشان لما تطلع تانية في الدراسة تكون فاهم الدكتور بيشرح إيه أو حتى يكون عندك خلفية بسيطة من كلامه وشرحه.

فرص الشغل:

مجال التحاليل الطبية الشائع بعد كلية علوم حضرتك خريج ميكرو تقدر تشتغل في معمل مباشرة لأن معاك تخصص كيمياء بردو أو حضرتك تاخد دبلومة كيمياء حيوي بتبقى في 6 شهور وتقدر تفتح معمل باسمك وتشتغل بردو.
الشغلانة الأشهر بعد علوم ميديكال ريب الشغلانة دي شغلانة مهلكة ومتعبة بس فلوسها حلوة.
شركات المياه والصرف أنت حضرتك دكتور أو بمعنى أصح كيميائي تقدر تشتغل في شركات المياه إزاي ؟؟ عن طريق أن حضرتك بتحلل المياه بتشوف هي صالحة للشرب ولا لا.
وبتشوف جودة المياه والكلام ده هتتدرب عليه إن شاء الله قبل ما تتخرج بسنة الكلية بتنزل تدريب علشان تستفاد.
مجال الجودة وسلامة الغذاء مجال كويس جداً.
وكذلك مراكز إنتاج كحول أو صابون أو أدوية بتشتغل فيها ككيميائي.
بالإضافة إلى الدراسات العليا من ماجستير أو دكتوراه والدبلومات.
والسفر خارج مصر للعمل بالمجالات اللي قولت عليها.

برنامج البايوتكنولوجي

تخيل إنك تقدر تتحكم في أسرار الحياة 🧬🧬🧬 !!..

تخيل إن العلم يديك القدرة إنك مش بس تستخدم الكائنات الحية، لا !! .. ده انت ممكن تطورها وتعدل في تركيب الـ DNA وجيناتها علشان تعطيك صفات جديدة ومنتجات جديدة تقدر تستخدمها في علاج أمراض كان ميئوس منها أو انتاج مواد ماكنتش موجودة قبل كده !! هو دا البيوتكنولوجي.

البيوتكنولوجي هو العلم اللي بيجمع بين الأحياء والتكنولوجيا علشان يفتح أبواب المستقبل في الطب، والصناعة، والزراعة والبيئة. علم بيخليك تستخدم الجينات كأدوات للتغيير في الكائنات الحية وتخلي الميكروبات مصانع لإنتاج البروتينات والإنزيمات والأدوية ومواد كتيرة مهمة ومفيدة للبشرية.

لو نفسك تدرس علم بيغير الواقع ويصنع حلول جديدة للبشرية في الطب والصناعة والصيدلة والبيئة والزراعة وغيرهم… يبقى مكانك الطبيعي هو عالم البيوتكنولوجي. 🚀

س: إيه المواد اللي بدرسها في برنامج البايوتكنولوجي؟

البيوتكنولوجي مجال واسع بتدرس فيه مجالات كتير زي الجانب الطبي والصناعي والبيئي والصيدلي والزراعي وغيرهم من المجالات اللي بتأهلك للعمل في أماكن كتير وتفتحلك سوق عمل واسع جدا.

بتقدر في برنامج البيوتكنولوجي تدرس الآتي:

الوراثة و الخلية - البيولوجية الجزيئية – الهندسة الوراثية ونقل الجينات– تكنولوجيا الانتاج الحيواني -الميكروبيولوجي (فيروسات و بكتيريا و فطريات) – ميكروبيولوجيا طبية – الكيمياء الحيوية – المعلوماتية الحيوية (بايوانفورماتكس) – النانوتكنولوجي - تطبيقات البايوتكنولوجي في المجال الطبي وتصنيع الأدوية - تكنولوجيا انتاج الوقود الحيوي _ بيولوجيا السرطان _ تكنولوجيا المفاعلات الحيوية..... و غيرها إلى جانب المقررات العملية إللى ها تعرفك تقنيات مختلفة حديثة في مجال البايوتكنولوجي.

وتقدر تشوف المقررات من اللائحة.

س: هل بايوتكنولوجي له الحق في الحصول على رخصة مزاولة المهنة التحاليل بعد الدبلومة؟

ج: معامل التحاليل الوراثية - من غير دبلومة.

معامل التحاليل الطبية - بتحتاج دبلومة كيمياء حيوية ودبلومة تحاليل طبية وده زي أي برنامج بالكلية (سواء عادي أو مميز بمصروفات) لأنك في النهاية معاك بكالوريوس علوم فلازم تاخد دبلومة علشان تفتح معمل.

س: إيه المواد اللي بدرسها عشان تؤهلني أشتغل في المجال الطبي من بايوتكنولوجي؟

ج: يعني مثلا في مواد الميكروبيولوجي والامراض اللي بتسببها الكائنات الدقيقة وأعراضها وطرق التشخيص الحديثة لها في معامل التحاليل. وفيه كورس أيض الأحماض النووية والأعراض والأمراض الناتجة عن الخلل في الأيض في الانسان نتيجة الخلل الجيني. وكورس البايوانفورماتكس اللي متصل بشكل كبير بمجال ال medical informatics غير مقرر الكانسر اللي بتدرسه في رابعة وفي ناس خريجة بايوتكنولوجي وحاليا شغالين في 57357 ومستشفيات غيرها.

✋🏻بنقول تاني مجالات سوق العمل كتير. يعنى ليس فقط في المجال الطبي ومعامل التحاليل الطبية ولكن كمان فيه فرص كتير في مؤسسات وشركات ومصانع مختلفة سواء شركات الأدوية أو المصل واللقاح أو شركات إنتاج الغذاء. أيضاً القسم أضاف البرنامج في خطة التعيين يعني ممكن يعين الأوائل معيدين من خريجين برنامج البايوتكنولوجي. يوجد أيضاً بالقسم برنامج دراسات عليا (بايوتكنولوجي) تقدر لو عايز تكمل فيه يمنح درجة الماجستير والدكتوراة في تخصص البايوتكنولوجي.

س: إيه هي الأماكن المتاحة في سوق العمل لخريج بايوتكنولوجي علوم بعد التخرج؟

ج: باحث أو مساعد باحث في المراكز البحثية والجامعات - مدينة زويل للعلوم والتكنولوجيا - مراكز بحوث الهندسة الوراثية - هيئات المصل واللقاح - مراكز بحوث الخلايا الجذعية - إنك تبقى bioinformatician - مستشفيات ومعاهد وأقسام ومراكز الأورام - أقسام ومعامل التشخيص الجزيئي للأمراض والمستشفيات التي تعمل بنظام التشخيصات الوراثية والعلاج الجيني - مستشفيات ومراكز وأقسام الحقن المجهري أطفال الأنابيب والتلقيح الصناعي وتكنولوجيا التكاثر- الطب الشرعي والجنائي - في معامل البيولوجيا الجزيئية - مراكز زراعة الأنسجة - مراقبة وضمان الجودة في شركات ومصانع الأدوية والأغذية - مصانع وشركات تطوير الأدوية - مجال التغذية العلاجية - معامل الكشف عن سلامة الأغذية والسموم بالوزارات والموانئ ومحطات تنقية مياه الشرب.

س: إيه الدبلومات المتاحة لخريج البايوتكنولوجي وتؤهله إنه يشتغل إيه؟

ج: تقدر تاخد دبلومة في التخصصات الآتية:

دبلومة كيمياء حيوية أو ميكروبيولوجي لو عايز تشتغل في مجال التحاليل الطبية
دبلومة تغذية لو هتشتغل في مجال التغذية.
دبلومة رقابة الجودة أو دبلومة السلامة والصحة المهنية لو هتشتغل في مجال الجودة في أي معمل أو شركة أو مصنع.
دبلومة البايوانفورماتكس لو هتشتغل بالبايوانفورماتكس في مجال البحث العلمي أو التطبيقي زي المستشفيات وغيرها.
دبلومة زراعة الأنسجة لو هتشتغل في معامل زراعة الأنسجة أو إنتاج الشتلات.

لمعرفة تفاصيل أكتر عن برنامج التكنولوجيا الحيوية والأنشطة والتدريبات والمسابقات ممكن تزورنا على صفحة البرنامج:

صفحة الفيسبوك – متنساش تتابعنا هناك عشان كل الأخبار المهمة فيديو تعريفي بسيط على اليوتيوب ♥ بروشور المقررات وبعض المعلومات الهامة

اعلان: خطوات قيد طالب مستجد

تتقدم كلية العلوم بخالص التهنئة إلى أبنائنا المقبولين للالتحاق بكلية العلوم للعام الجامعي ٢٠٢٦/٢٠٢٥م متمنيين لهم التوفيق والسداد.

ونتشرف بأن نعلن لسيادتكم المستندات المطلوبة للالتحاق بالكلية:

أولاً: المستندات المطلوبة

بطاقة ترشيح مكتب التنسيق (٣ صور منها).
أصل شهادة الثانوية العامة (٣ صور منها). على كل طالب الاحتفاظ بصورة من استمارة الثانوية العامة على الموبايل أو بالبيت للضرورة.
أصل شهادة الميلاد (٣ صور منها).
عدد ٦ صور شخصية.
٢ صورة من البطاقة الشخصية للطالب وصورة من البطاقة الشخصية للأم والأب.
استمارة ٢ جند + استمارة ٦ جند إلكتروني وليست ورقية + صورة بطاقة للطالب (ذكور فقط).
الكشف الطبي يستكمل بعد إجراءات الكشف الطبي.
المصروفات الدراسية يتم تحرير إذن الدفع من شئون الطلاب والدفع بالفيزا. المبلغ المطلوب (لم يحدد بعد) للبرامج العادية والمبلغ المطلوب للبرامج المميزة (لم يحدد بعد).
الاحتفاظ بنسخة من الملف مع الطالب وخاصة صورة من شهادة الثانوية العامة (لإحضارها أثناء التحويل من الكلية).
الحضور إلى الكلية لتقديم المستندات عند الإعلان عن ذلك على موقع الكلية.

أسئلة متكررة

س: ما هو نظام التقدير التراكمي (GPA)؟

بص يا سيدي، الجي بي إيه (GPA) ده ببساطة هو نظام التقدير التراكمي. يعني إيه تراكمي؟ يعني مش بس بيبص على مادة واحدة لوحدها، لا، بيجمع أداءك في كل المواد ويطلعلك في الآخر رقم واحد بيمثل مستواك العام.

النقطة التانية المهمة، إن نظام الـ GPA بيختلف من كلية للتانية:

في كليات بيبقى من 5.
وفي كليات تانية من 4.

إحنا بقى في كلية العلوم – جامعة دمياط، عندنا الجي بي إيه محسوب من 4.

طيب، الرقم ده بيمثل إيه؟ الرقم ده ليه تقدير مقابل. يعني مش مجرد رقم والسلام، لا، هو بيعبر عن تقدير زي "امتياز – جيد جدًا – جيد – مقبول".

خلينا نفهمها أكتر:

لو جبت 4.00 بالظبط، كده إنت واخد امتياز كامل.
لو جبت من 3.67 لحد أقل من 4، ده اسمه امتياز منخفض.
من 3.33 لحد 3.67، ده جيد جدًا مرتفع.
من 3.00 لحد 3.33، ده جيد جدًا منخفض.
من 2.67 لحد 3.00، ده جيد مرتفع.
من 2.33 لحد 2.67، ده جيد منخفض.
من 2.00 لحد 2.33، ده كده مقبول.
أقل من 2.00؟ يبقى للأسف راسب.

خد بالك إن الكلام ده بيكون على مستوى المادة الواحدة. يعني المادة اللي جبت فيها مثلاً "A" أو "امتياز"، هتلاقي جنبها رقم 4. أو لو جبت "B+" مثلاً، هتلاقي الرقم المقابل ليها 3.33.

طيب، تعالى بقى نشوف التراكمي (CGPA).

إيه اللي بيحصل؟ لما النتيجة بتظهر، بيظهرلك جنب كل مادة: اسمها، درجتك، التقدير بتاعك، وكمان الرقم اللي هو الـ GPA بتاعها. وفي الآخر تحت خالص، بيكتبلك "التقدير التراكمي" كرقم من 4. الرقم ده مش هيكتبلك قصاده إذا كان امتياز ولا جيد جدًا، هو بيكتبه رقم وخلاص. وإنت دورك هنا إنك تبص في الجدول اللي فوق وتقارن الرقم عشان تعرف إنت واقف فين.

طب إزاي بيتحسب الرقم ده؟

الموضوع بسيط: بتجمع كل مادة (الـ GPA بتاعها × عدد الساعات المعتمدة للمادة دي)، وتجمع ده لكل المواد، وبعدين تقسم على إجمالي عدد الساعات. النتيجة اللي تطلعلك هي التراكمي بتاعك.

بس في طريقة أسهل من كده بكتير: إنك تحوّل درجاتك كلها للنسبة المئوية.

إزاي؟ تشوف مجموعك الكلي من إجمالي الدرجات الكاملة، وتعمل عملية قسمة بسيطة، وتطلع بالنسبة المئوية. وهنا بقى الموضوع بيبقى أوضح وأسهل:

لو جبت 90% أو أكتر، إنت كده في الامتياز.
من 85% لحد أقل من 90%، ده اسمه امتياز منخفض.
من 80% لحد أقل من 85%، ده جيد جدًا.
من 70% لحد أقل من 80%، ده جيد.
من 60% لحد أقل من 70%، ده مقبول.
أقل من 60%؟ يبقى راسب.

فاللي بيحصل إنك ممكن تختصر على نفسك بدل ما تقعد تبص في الأرقام العشرية (3.33 – 3.67 – 2.67)، لأ، تجيبها بالنسبة المئوية، وتحدد تقديرك على طول. ودي بالنسبة لناس كتير أوضح وأريح.

يعني الخلاصة:

كل مادة ليها رقم يقابل تقدير.
الأرقام دي بتتجمع وتتحسب بطريقة معينة عشان يطلعلك التراكمي.
التراكمي بيظهرلك كرقم بس، وإنت اللي بتحدد تقديرك من الجدول.
أو تحسبها بالنسبة المئوية وتبسط الدنيا.

س: أنا مجموعي كذا هل هقدر هلحق إني أدخل البرنامج دا؟

ج: كل برنامج بيكون محدد نسبة لعدد الطلاب اللي هيستقبلهم كل سنة أنك تلحق أو لا دا معتمد على درجاتك مقارنة بدرجات باقي دفعتك.

يعني مثلاً لو البرنامج دا بيستقبل 20% من الطلاب وفي 100 طالب كتبوه رغبة أولى فالبرنامج هيقبل منهم أعلى 20 بس. لو درجتك مجبتش البرنامج دا ساعتها بتتصنف نفس التصنيف في الرغبة التانية.

س: أنا مغترب إزاي أوصل للكود بتاعي علشان أسجل على موقع السكن الجامعي؟

ج: أول حاجة: الكود بناخده من موقع "Myu". بندخل على الموقع عادي. نعمل تسجيل دخول كطلاب جدد وندخل الرقم القومي والإيميل. مهم جداً: الإيميل يكون شغال ومعانا على الموبايل، عشان بيتبعت عليه بيانات أو أرقام هنحتاجها. بعد كده بعد ما نعمل تسجيل دخول بنملأ البيانات اللي بيطلبها الموقع، ودي بتكون بيانات شخصية عادية. بعد كده بندخل على قسم "البيانات الشخصية." هناك هتلاقوا تسع قوائم موجودة في الصفحة. من خلال "البيانات الشخصية" تقدروا تجيبوا الكود المطلوب.

رابط موقع "Myu"